Тәжікстан Республикасында Оқулықтар мен оқу-әдістемелік материалдарды STEM-білім беру моделіне сәйкес әзірлеу жөніндегі ұлттық семинар
🌟 15-18 шілде аралығында «Білім беру бағдарламалары орталығы» филиалының пән мамандары Абдурахманова Азиза, Жанбулатова Гаухар және Бекхожаев Сайдхожа Тәжікстан Республикасында Оқулықтар мен оқу-әдістемелік материалдарды STEM-білім беру моделіне сәйкес әзірлеу жөніндегі ұлттық семинарға халықаралық сарапшылар ретінде қатысты.
📚 Семинар барысында биология, химия және физика пәндерінен оқулықтар мен оқу-әдістемелік материалдарды ашық білім беру ресурстары (АББР) ретінде әзірлеудің жалпы тәсілдері айқындалды. Жаңа оқулықтарға құзыреттіліктерге негізделген тәсілді, заманауи үрдістер мен оқытудың инновациялық әдістерін енгізу мәселелеріне ерекше назар аударылды.
✨ Мамандарымыздың осындай маңызды іс-шараға қатысқаныны біз үшін мақтаныш, олардың үлесі Тәжікстандағы STEM білім берудің сапасын арттыруға көмектеседі деген үміттеміз!
«Оқу бағдарламаларын тиімді ендіру: мониторинг, есеп беру және зерттеу» тақырыбындағы тренинг
«Назарбаев Зияткерлік мектептері» ДББҰ Білім беру бағдарламалары орталығының пән мамандары «Оқу бағдарламаларын тиімді ендіру: мониторинг, есеп беру және зерттеу» тақырыбында тренингтен өтті. Курсты Кембридж университетінің тренерлері Элисон Родригес (халықаралық білім беруді зерттеу орталығының жетекшісі) және Сара Нельсон (оқу жоспары бағдарламаларының менеджері) өткізді. Тренингке қатысушылар зерттеу жоспарларын жазу, сандық және сапалық зерттеулер жүргізу, сондай-ақ деректерді таныстыру және жариялау әдістерін қарастырды.
«Ауылдық жерлердегі тірек мектептерінің әлеуетін дамыту» қайырымдылық жобасы аясында оқушылардың зерттеу дағдыларын қалыптастыру бойынша семинарлар.
«Ауылдық жерлердегі тірек мектептерінің әлеуетін дамыту» қайырымдылық жобасы аясында Білім беру бағдарламалары орталығының мамандары 26 наурыз бен 14 сәуір аралығында Қазақстанның 16 облысының мұғалімдеріне арналған аймақтық семинарлар сериясын сәтті жүзеге асырды. Семинарлар Атырау, Семей, Көкшетау және Шымкент қалаларының Зияткерлік мектептерінің, сондай-ақ Жамбыл облысы Б. Момышұлы атындағы ауылдың және Қарағанды облысы Абай қаласының мектептерінің базасында өткізілді. Іс-шара барысында «Физика», «Химия», «Биология», «География», «Тарих», «Көркем еңбек», «Музыка» пәндерінен оқушылардың зерттеу дағдыларын қалыптастыру бойынша бас қосқан 435 мұғалім өзара білім мен тәжірибе алмасты.
Мысалы, физика семинарларында ток көздерінің ішкі кедергісін анықтауға бағытталған тәжірибелер, сондай-ақ математикалық маятниктің көмегімен еркін құлауды зерттеу және тұтқыр сұйықтықтағы доптың қозғалыс жылдамдығының оның мөлшеріне тәуелділігін зерттеу жүргізілді. Сонымен қатар, қатысушылар толқын ұзындығын дифракциялық тордың көмегімен анықтады.
Химия семинарында сапалық және сандық талдау, химиялық реакциялардың жылдамдығы сияқты тапсырмаларды, зертханалық және практикалық жұмыстарды жүйелі орындау арқылы зерттеу дағдыларын дамытуға мүмкіндік беретін тәжірибелік эксперименттердің маңыздылығына баса назар аударылды.
Биология бойынша семинар бағдарламасы аясында жасушалардағы осмостық үдерістерді, температураның ферментативті белсенділікке әсерін және өнімдердегі С дәруменінің құрамын анықтауға бағытталған зертханалық жұмыстар жүргізілді. Бұл сабақтар физиологиялық үдерістер мен биохимиялық реакциялар туралы білімді тереңдетуге көмектесті.
География мұғалімдері қышқыл жаңбырдан және табиғатқа әсер ететін басқа факторлардан туындаған экологиялық өзгерістерді талдау үшін картаға түсіру және деректерді визуализациялау әдістеріне назар аударды.
Тарих пәні бойынша семинар теориялық білімді көрсетіп қана қоймай, тарихи оқиғаларды талдау негізінде оқушылардың зерттеу дағдыларын дамытуға ықпал еткен шеберлік сыныптары мен тәжірибелік тапсырмаларды қамтыды.
Сондай-ақ, көркем шығармашылық және музыка сабақтарында жобалық тәсіл қарастырылды, онда қатысушылар проблемаларды тұжырымдауды, ақпаратты талдауды және шығармашылық жобаларды әзірлеуді үйренді. Бұл тәсіл ойлау дизайны мен шығармашылық ойлау әдістерінің маңыздылығын атап өтті.
«Назарбаев Зияткерлік мектептері» ДББҰ 2020 жылдан бастап жүзеге асырып келе жатқан бұл жоба еліміздің ауылдық мектептерде білім беру стандарттарын арттыруға деген ұмтылысын қолдай отырып, өңірлердің білім беру әлеуетін нығайтуға елеулі үлес қосып келеді.
Оқулықтар мен оқу-әдістемелік кешендерді қайта қарау жобасы шеңберіндегі семинарлар.
«Білім беру бағдарламалары орталығы» филиалы 2024 жылдың 5-9 ақпан аралығында «Назарбаев Зияткерлік мектептері» – NIS-programme білім беру бағдарламасына сәйкес 8-сынып оқушылары үшін оқулықтар мен оқу-әдістемелік кешендерді қайта қарау жобасы шеңберінде авторлар мен редакторлар үшін «Математика», «Химия», «Биология», «Информатика», «География», «Қазақстан тарихы», «Дүниежүзі тарихы» пәндері бойынша онлайн семинарлар өткізілуде. Онда 29 оқулық авторлары мен 7 редактор қатысуда.
Білім беру бағдарламалары орталығы кәсіби бағдарлы элективті курстарды әзірледі.
Жоғары мектеп оқушыларына кәсіптік бағдар беруге қатысты кешенді жұмыс жүргізуде пән мұғалімдері оқу үдерісіне кәсіптік бағыттағы материалдарды енгізу керек. Оқушылар бір салаға жататын әртүрлі кәсіп түрлеріне қызығушылық танытуы мүмкін, сондықтан бұл мәселені шешу оқушылардың жеке білім беру траекторияларын дұрыс құруды талап етеді.
«Статистикалық деректерді жинау және өңдеудің математикалық әдістері», «Мобильдік қосымшаларды әзірлеуші», «Тәжірибелік электротехника», «Химиялық талдау зертханашысы», «Нутрициология», «Туроперейтинг», «Копирайтинг», «Графикалық дизайн негіздері», «Қоюшы-режиссер», «Инвестиция негіздері» атты кәсіби бағдарлы элективті курстар жоғары мектеп оқушыларына арналған бейінді оқытуды қамтитын элективті курстар болып табылады. Олар оқу жоспарының мектеп бағдарламасындағы компоненттері есебінен жүзеге асырылады. Элективті курстарды оқытуда бір топтағы оқушылар саны 12 адамнан аспау керек.
Элективті курстар қызметтері мен міндеттерінің ауқымы олардың бейінді оқыту жүйесіндегі рөліне қарай анықталады.
Кәсіби бағдарлы элективті курстардың қызметтері:
– жаңа мамандықтарды зерделеу, қазіргі заманның негізгі проблемаларынан туындайтын қажетті кәсіби дағдыларды сипаттау;
– негізгі және бейінді пәндік білімді кеңейту және тереңдету;
– практикалық білім беру;
– кәсіби дағдыларды дамыту;
– саланың дамуымен және жаңа үрдістерімен танысу.
Кәсіби бағдарлы элективті курстардың міндеттері:
– оқу материалының қосымша бөлімдерімен таныстыру, оқытылатын пәндерге қатысты мамандандырылған білімді кеңейту және тереңдету;
– кәсіби бейімделуге ықпал ету;
– болашақ мансап жолына дайындау;
– оқушылардың ақпараттық және коммуникативтік құзыреттілігін арттыру, сондай-ақ олардың танымдық және шығармашылық жұмыспен айналысуға ынтасын арттыру.
Осылайша, элективті курстар белгілі бір бейінді бағыттағы мазмұнды және әрекетті қамтып, оған тән мәселелер мен жағдаяттарды модельдеу керек.
